ਰਾਜਵਿੰਦਰ ਰੌਂਤਾ
ਸਾਡੀਆਂ
ਦੋ ਪੀੜ੍ਹੀਆਂ ਗੁਜ਼ਰ ਗਈਆਂ ਨੇ
ਚੰਗੇ ਦਿਨ
ਡੀਕਦਿਆਂ ਡੀਕਦਿਆ
ਮੇਰੀ ਦਾਦੀ ਵੀ ਸਿਲਾ ਚੁਗਣ ਜਾਂਦੀ ਸੀ
ਮੇਰੀ ਮਾਂ ਵੀ ਬੱਲੀਆਂ
ਚੁਗਣ ਜਾਂਦੀ
ਉਸ ਨਾਲ ਮੇਰੀ
ਭੈਣ ਵੀ ਤੁਰ ਜਾਂਦੀ
ਦਾਦੀ ਵਰਜਦੀ
ਕੁੜੀਏ ਤੇਰਾ ਸੂਟ ਪੁਰਾਣਾ
ਘਸਿਆ ਵਾ
ਪੀਪੂੰ ਹੋਇਆ
ਰਹਿਣ ਦੇ
ਇਹ ਤਾਂ ਸਾਨੂੰ ਵੀ
ਕਹਿ ਕੇ
ਕੜੈਨ ਖਾਧੀ ਘੁੱਟ ਜੀ ਭਰਦੀ
ਹੁਣ ਮੇਰੀ ਘਰ ਵਾਲੀ
ਵੀ ਜਾਂਦੀ ਹੈ
ਕਮਬੈਨਾਂ ਦੇ ਵੱਢ ਚੋ
ਸਿੱਟੇ ਚੁਗਣ
ਕੱਲ੍ਹ ਮੇਰੀ ਕੁੜੀ ਆਖਦੀ
ਮੈਨੂੰ ਵੀ ਮੋਬਾਈਲ ਲੈ ਦਿਓ
ਹੁਣ ਸਾਡੀ ਪੜਾਈ ਹੁੰਦੀ ਅਾ
ਆਨ ਲਾਇਨ
ਮੈ ਫਿਰ ਪਿੱਛੇ ਰਹਿ ਜਉਂ
ਮੈ ਕਿਹਾ
ਕੁੜੀਏ
ਕੈਪਟਨ ਨੇ ਵਾਅਦਾ ਤਾਂ ਕੀਤਾ ਸੀ
ਭੇਜੂਗਾ ਨਵੇਂ ਸਮਾਰਟ ਫੋਨ
ਡੀਕਲਾ
ਚਾਰ ਕੁ ਦਿਨ ਹੋਰ
ਮੈਨੂੰ ਹੈਰਾਨ ਜਿਹਾ ਕਰ ਦਿੱਤਾ
ਚੌਥੀ ਚ ਪੜਦੀ ਰਾਣੋਂ ਨੇ
ਸਰਕਾਰ ਦੀ
ਵਾਅਦਿਆਂ ਦੀ ਪੰਡ ਚੋ
ਲੀਰਾਂ ਫਰੋਲਦਿਆਂ
ਫਿਰ ਬੋਲੀ
ਆਹ ਕੀ ਕਰਨਾ ਮੈ ਹੁਣ
ਝੋਲੇ ਚੋਂ ਕਿਤਾਬਾਂ ਕੱਢ ਕੇ
ਮੋਢੇ ਪਾਕੇ
ਚਲ ਮੰਮੀ ਚੱਲੀਏ
ਕਣਕ ਚੁਗਣ
ਫੇਰ ਈ ਆਊਗਾ
ਸੈਕੰਡ ਹੈਂਡ
ਐਂਡ੍ਰਾਇਡ ਫੋਨ।।
ਰਾਜਵਿੰਦਰ ਰੌਂਤਾ,9876486187
