ਗਲਾਸਗੋ (ਮਨਦੀਪ ਖੁਰਮੀ ਹਿੰਮਤਪੁਰਾ)
ਸਕਾਟਲੈਂਡ ਵਿੱਚ ਚੱਲ ਰਹੀ ਕੋਰੋਨਾ ਟੀਕਾਕਰਨ ਮੁਹਿੰਮ ਦੀ ਲੜੀ ਤਹਿਤ 12 ਤੋਂ 15 ਸਾਲ ਦੀ ਉਮਰ ਦੇ ਬੱਚਿਆਂ ਨੂੰ ਸੋਮਵਾਰ ਤੋਂ ਫਾਈਜ਼ਰ ਦੇ ਕੋਵਿਡ -19 ਟੀਕੇ ਦੀ ਇੱਕ ਖੁਰਾਕ ਦਿੱਤੀ ਜਾਵੇਗੀ। ਇਸ ਯੋਜਨਾ ਦੀ ਪੁਸ਼ਟੀ ਫਸਟ ਮਨਿਸਟਰ ਨਿਕੋਲਾ ਸਟਰਜਨ ਨੇ ਮੰਗਲਵਾਰ ਨੂੰ ਸਕਾਟਿਸ਼ ਸੰਸਦ ਵਿੱਚ ਕੀਤੀ ਹੈ। ਯੂਕੇ ਦੇ ਮੁੱਖ ਮੈਡੀਕਲ ਅਫਸਰਾਂ ਅਨੁਸਾਰ ਟੀਕਾਕਰਨ ਸਿੱਖਿਆ ਖੇਤਰ ਵਿੱਚ ਪਈ ਰੁਕਾਵਟ ਨੂੰ ਘਟਾ ਸਕਦਾ ਹੈ। ਸਟਰਜਨ ਨੇ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਸੋਮਵਾਰ, 20 ਸਤੰਬਰ ਤੋਂ, ਕਿਸੇ ਵੀ 12 ਤੋਂ 15 ਸਾਲ ਦੇ ਬੱਚਿਆਂ ਲਈ ਡ੍ਰੌਪ-ਇਨ ਕਲੀਨਿਕ ਖੁੱਲ੍ਹੇ ਰਹਿਣਗੇ ਅਤੇ 27 ਸਤੰਬਰ ਤੋਂ ਸਾਰੇ 12 ਤੋਂ 15 ਸਾਲ ਦੇ ਬੱਚਿਆਂ ਨੂੰ ਵੈਕਸੀਨ ਲਈ ਪੱਤਰ ਭੇਜੇ ਜਾਣਗੇ ।ਯੂਕੇ ਦੀ ਟੀਕਾਕਰਨ ਕਮੇਟੀ ਜੇ ਸੀ ਵੀ ਆਈ ਨੇ ਸਿੱਟਾ ਕੱਢਿਆ ਕਿ 12 ਤੋਂ 15 ਸਾਲ ਦੇ ਬੱਚਿਆਂ ਲਈ ਟੀਕਾਕਰਨ ਦੇ ਸਿਹਤ ਲਾਭ, ਕਿਸੇ ਵੀ ਜੋਖਮ ਤੋਂ ਜ਼ਿਆਦਾ ਹਨ।
