ਰਜਨੀ ਵਾਲਿਆ
ਲੋਹੜੀ ਦੇ ਤਿਉਹਾਰ ਦੇ ਉੱਤੇ,
ਸਾਂਝ ਦਿਲਾਂ ਦੀ ਪਾ ਲੈਂਦੇ ਹਾਂ |
ਭਾਵੇਂ ਰੁੱਸਿਆ-ਰੁੱਸਿਆ ਏ ਮਨ,
ਚਲੋ ਉਸਨੂੰ ਅੱਜ ਮਨਾ ਲੈਂਦੇ ਹਾਂ |
ਲੋਹੜੀ ਦੇ ਤਿਉਹਾਰ ਦੇ ਉੱਤੇ,
ਸਾਂਝ ਦਿਲਾਂ ਦੀ ਪਾ ਲੈਂਦੇ ਹਾਂ |
ਹਰ ਪਾਸੇ ਮਾਹੌਲ ਖੁਸੀ਼ ਦਾ,
ਖਿੜ-ਖਿੜ,ਖਿੜ-ਖਿੜ ਹਾਸੇ ਵੰਡੀਏ |
ਭਾਈ-ਭਾਈ ਵਿੱਚ ਤਕਰਾਰ ਨਾ ਹੋਵੇ,
ਜੇ ਹੋਵੇ ਉਹਨਾਂ ਨੂੰ ਗੰਢੀਏ |
ਈਮਾਨਦਾਰੀ ਨਾਲ ਅੱਗੇ ਵਧੀਏ,
ਰੱਬ ਨੂੰ ਬਣਾ ਗਵਾਹ ਲੇਂਦੇ ਹਾਂ |
ਲੋਹੜੀ ਦੇ ਤਿਉਹਾਰ ਦੇ ਉੱਤੇ,
ਸਾਂਝ ਦਿਲਾਂ ਦੀ ਪਾ ਲੈਂਦੇ ਹਾਂ |
ਵਿੱਚ ਰਹੀਂ ਤਹਿਜੀਬ ਨੀ ਜਿੰਦੇ,
ਸਾਰੇ ਈ ਤੈਨੂੰ ਚੰਗਾ ਬੋਲਣ |
ਤੂੰ ਲੋੜ ਪੈਣ ਤੇ ਝੱਟ ਕੰਮ ਆਵੇਂ,
ਤਾਈਂਓ ਸਾਰ ਈ ਤੈਨੂੰ ਟੋਲਣ |
ਦਰਦ ਵੰਡਾ ਕੇ ਕਿਸੇ ਦੁਖੀ ਦਾ,
ਉਸਦਾ ਭਾਰ ਵੰਡਾ ਲੈਂਦੇ ਹਾਂ |
ਲੋਹੜੀ ਦੇ ਤਿਉਹਾਰ ਦੇ ਉੱਤੇ,
ਸਾਂਝ ਦਿਲਾਂ ਦੀ ਪਾ ਲੈਂਦੇ ਹਾਂ |
ਖਿਆਲਾਂ ਦੀ ਪਤੰਗ ਮੇਰੀ ਨੂੰ,
ਤੂੰ ਮਾਲਕ ਮੇਰੇ ਉੱਡਣ ਲਾ ਦੇ |
ਹੰਕਾਰ ਮੈਂ ਨਈਂ ਭੋਰਾ ਵੀ ਕਰਦੀ,
ਸਭਨਾਂ ਦੇ ਦੁੱਖਾਂ ਦੀ ਅੱਜ ਦਵਾ ਦੇ |
ਅੱਜ ਸੱਚ ਦੀ ਕਿਰਤ ਕਮਾਈ ਕਰਕੇ,
ਅਸੀਂ ਥੋੜਾ ਪੁੰਨ ਕਮਾ ਲੈਂਦੇ ਹਾਂ |
ਲੋਹੜੀ ਦੇ ਤਿਉਹਾਰ ਦੇ ਉੱਤੇ,
ਸਾਂਝ ਦਿਲਾਂ ਦੀ ਪਾ ਲੈਂਦੇ ਹਾਂ |
ਰਾਤ ਹੋਣ ਤੇ ਭੁੱਗਾ ਬਾਲਕੇ,
ਸਾਰੇ ਬੈਠ ਕੇ ਨਿੱਘ ਮਾਣਾਂਗੇ |
ਸਿ਼ਕਵੇ ਸਿਕਾਇਤਾਂ ਦੂਰ ਕਰਕੇ,
ਇੱਕ ਦੂਜੇ ਨੂੰ ਫਿਰ ਜਾਣਾਂਗੇ |
ਜਮੀਨੀ ਦੂਰੀ ਦੀ ਗੱਲ ਕੋਈ ਨਾ,
ਦੂਰੀਆਂ ਮਨੋ ਘਟਾ ਲੈਂਦੇ ਹਾਂ |
ਲੋਹੜੀ ਦੇ ਤਿਉਹਾਰ ਦੇ ਉੱਤੇ,
ਸਾਂਝ ਦਿਲਾਂ ਦੀ ਪਾ ਲੈਂਦੇ ਹਾਂ |
ਅਸੀਂ ਹੁਣ ਲੋਹੜੀ ਦੇ ਤਿਉਹਾਰ ਤੋਂ,
ਪਹਿਲਾਂ ਲੋਹੜੀ ਮੰਗਣ ਜਾਣਾ ਭੁੱਲੇ |
ਇਕੱਠਿਆ ਹੋ ਕੇ ਜਸ਼ਨ ਮਨਾਉਣਾ,
ਤੇ ਵੰਡ-ਤਰੰਡ ਕੇ ਖਾਣਾ ਭੁੱਲੇ |
ਆਓ ਤੋੜੀਏ ਮਾਣ ਦੇ ਕੱਚ ਨੂੰ,
ਅੱਜ ਬੈਠ ਇਕੱਠਿਆਂ ਖਾ ਲੈਂਦੇ ਹਾਂ |
ਲੋਹੜੀ ਦੇ ਤਿਉਹਾਰ ਦੇ ਉੱਤੇ,
ਸਾਂਝ ਦਿਲਾਂ ਦੀ ਪਾ ਲੈਂਦੇ ਹਾਂ |
ਆਓ ਧੀਆਂ ਦੀ ਵੀ ਲੋਹੜੀ ਸਾਰੇ,
ਚਾਵਾਂ ਨਾਲ ਮਨਾਈਏ ਆਪਾਂ |
ਗੁਣ ਪੁੱਤਾਂ ਦੇ ਤਾਂ ਗਾਉਂਦੇ ਹੀ ਹਾਂ,
ਧੀਆਂ ਦੇ ਵੀ ਗੁਣ ਗਾਈਏ ਆਪਾਂ |
ਰਜਨੀ ਧੀ ਹੁੰਦੀ ਏ ਜੱਗ ਦੀ ਜਨਣੀ,
ਉਸਦੇ ਕੋਲੋਂ ਵੀ ਦੁਆ ਲੈਂਦੇ ਹਾਂ |
ਲੋਹੜੀ ਦੇ ਤਿਉਹਾਰ ਦੇ ਉੱਤੇ,
ਸਾਂਝ ਦਿਲਾਂ ਦੀ ਪਾ ਲੈਂਦੇ ਹਾਂ |
