ਤੇਰੇ ਕਰਕੇ ਮਲੰਗਾ

ਰਜਨੀ ਵਾਲੀਆ
ਤੇਰੇ ਕਰਕੇ ਮਲੰਗਾ,
ਮੈਂ ਮਲੰਗ ਹੋ ਗਈ |
ਤੈਨੂੰ ਦੇ ਕੇ ਸਾਰੇ ਰੰਗ,
ਵੇ ਮੈਂ ਬੇਰੰਗ ਹੋ ਗਈ |
ਤੇਰੇ ਕਰਕੇ ਮਲੰਗਾ,
ਮੈਂ ਮਲੰਗ ਹੋ ਗਈ |

ਤੇਰੀਆਂ ਮੈਂ ਸੋਚਾਂ ਵਿੱਚ,
ਸੋਚ ਹੋਈ ਸੋਗੀ ਵੇ |
ਲਾ ਲਿਆ ਮੈਂ ਐਂਵੇ ਹੋਈ,
ਇਸ਼ਕੇ ਦੀ ਰੋਗੀ ਵੇ |
ਬੜੀ ਸੋਹਣੀ ਸੀ ਜਿੰਦਗੀ,
ਬੇਢੰਗ ਹੋ ਗਈ |
ਤੇਰੇ ਕਰਕੇ ਮਲੰਗਾ,
ਮੈਂ ਮਲੰਗ ਹੋ ਗਈ |

ਵੈ ਮੈਂ ਭੁੱਲੀ ਸਾਰੇ,
ਰਸਮੋਂ ਰਿਵਾਜ ਜੱਗਦੇ |
ਹੁਣ ਤੇਰੇ ਅਹਿਸਾਸ,
ਮੈਨੂੰ ਮੇਰੇ ਲਗਦੇ |
ਮੈਂ ਉੱਡੀ ਅੰਬਰਾਂ ਚ,
ਏਦਾਂ ਵੇ ਪਤੰਗ ਹੋ ਗਈ |
ਤੇਰੇ ਕਰਕੇ ਮਲੰਗਾ,
ਮੈਂ ਮਲੰਗ ਹੋ ਗਈ |

ਮੈਂ ਵੀ ਤੇਰੀ ਜਮਾਤ,
ਵਿੱਚ ਰੱਖ ਲਏ ਨੇਂ ਪੈਰ |
ਜੁਗਾਂ-ਜੁਗਾਂ ਤੱਕ ਜੀਵੇਂ,
ਹੋਵੇ ਮਲੰਗਾ ਤੇਰੀ ਖੈਰ |
ਮੇਰੀ ਪਰਤਾਂ ਤੋਂ ਬਾਹਰੀ,
ਅੱਜ ਸੰਗ ਹੋ ਗਈ |
ਤੇਰੇ ਕਰਕੇ ਮਲੰਗਾ,
ਮੈਂ ਮਲੰਗ ਹੋ ਗਈ |

ਹੋਈ ਤੇਰੇ ਰਾਹਾਂ ਦੀ ਰਾਹੀ,
ਤੇਰੇ ਸਾਹਵਾਂ ਵਿੱਚ ਸਾਹ |
ਕੱਟ ਘੜੀ ਵੀ ਨਾ ਹੋਵੇ,
ਨੇਂ ਚੰਨ ਤਾਰੜੇ ਗਵਾਹ |
ਹੱਸਾਂ-ਰੋਵਾਂ ਤੇਰੇ ਕਹੇ,
ਖੰਗ ਵਿੱਚ ਖੰਗ ਹੋ ਗਈ |
ਤੇਰੇ ਕਰਕੇ ਮਲੰਗਾ,
ਮੈਂ ਮਲੰਗ ਹੋ ਗਈ |

ਵੇ ਮੈਂ ਰੁਮਕਾਂ ਤੇਰੀਆਂ,
ਸੁਗੰਧੀਆਂ ਦੇ ਵਿੱਚ |
ਵੇ ਸਕੂਨ ਬੜਾ ਤੇਰੀਆਂ,
ਪਾਬੰਦੀਆਂ ਦੇ ਵਿੱਚ |
ਮੈਂ ਤੇਰੇ ਜਿੰਦੇ ਨੂੰ ਵੇ ਲੱਗੀ,
ਹੋਈ ਜੰਗ ਹੋ ਗਈ |
ਤੇਰੇ ਕਰਕੇ ਮਲੰਗਾ,
ਮੈਂ ਮਲੰਗ ਹੋ ਗਈ |

ਝੂਠੇ ਕੀਤੇ ਨਾ ਵਾਅਦੇ,
ਤੇ ਨਿਭਾਉਣੇ ਦਾ ਚੱਜ |
ਦੇਵੇ ਨਿਭਾਉਣ ਦੀ ਸ਼ਕਤੀ,
ਓ ਸਾਰੀ ਆਪ ਰੱਖੇ ਲੱਜ |
ਬੇਢੰਗੀਓਂ ਮੈਂ ਤੇਰੇ ਲਈ,
ਅੱਜ ਢੰਗ ਹੋ ਗਈ |
ਤੇਰੇ ਕਰਕੇ ਮਲੰਗਾ,
ਮੈਂ ਮਲੰਗ ਹੋ ਗਈ |

ਤੇਰੀ ਦੀਦ ਨਈਂ ਹੁੰਦੀ,
ਸਾਡੇ ਹੁੰਦੇ ਨਾ ਗੁਜ਼ਾਰੇ |
ਕਦੋਂ ਦੇਵਣੀ ਦਰਸ ਸਾਡੇ,
ਸਾਡੇ ਦਿਲ ਥੀਂ ਡਾਢੇ ਭਾਰੇ |
ਰਜਨੀ ਤੇਰੇ ਸ਼ਬਦ-ਸ਼ਬਦ,
ਦਾ ਵੇ ਪ੍ਰਸੰਗ ਹੋ ਗਈ |
ਤੇਰੇ ਕਰਕੇ ਮਲੰਗਾ,
ਮੈਂ ਮਲੰਗ ਹੋ ਗਈ |