ਜ਼ਿੰਦੜੀ ਮੈਂ ਤੇਰੇ ਨਾਂ ਏ ਲਾਈ ਸੋਹਣਿਆ
ਅੰਗ ਅੰਗ ਦਿੰਦਾ ਏ ਗਵਾਹੀ ਸੋਹਣਿਆ
ਘੁਲੀ ਸਾਹਾਂ ਵਿੱਚ ਤੇਰੇ ਬਣ ਖੁਸ਼ਬੋ I
ਚੰਨ ਨੂੰ ਹੁੰਦੀ ਏ ਜਿਵੇਂ ਚਾਨਣੀ
ਦੀਵੇ ਨੂੰ ਹੁੰਦੀ ਏ ਜਿਵੇਂ ਲੋਅ I
ਦੁੱਖ ਸੁੱਖ ਵਿੱਚ ਸਦਾ ਤੂੰ ਬਣੀ ਮੇਰਾ ਹਾਣੀ ਵੇ
ਬਣੀ ਮੇਰਾ ਰਾਜਾ ਮੈਂ ਵੀ ਬਣਾਂ ਤੇਰੀ ਰਾਣੀ ਵੇ
ਮਹਿਕ ਪਿਆਰ ਦੀ ਲਵਾਂ ਸਾਹਾਂ ‘ਚ ਸਮੋਅ I
ਚੰਨ ਨੂੰ ਹੁੰਦੀ ਏ ਜਿਵੇਂ ਚਾਨਣੀ
ਦੀਵੇ ਨੂੰ ਹੁੰਦੀ ਏ ਜਿਵੇਂ ਲੋਅ I
ਵਾਸਤਾ ਪਿਆਰ ਦਾ ਪਰਾਂਹ ਛੱਡ ਮਗਰੂਰੀ ਵੇ
ਮੁਹੱਬਤਾਂ ਦਾ ਇਜ਼ਹਾਰ ਹੁੰਦਾ ਕਰਨਾ ਜਰੂਰੀ ਵੇ
ਰੂਹ ਸਾਡੀ ੲਿੱਕੋ ਭਾਵੇਂ ਬੁੱਤ ਲੱਗਦੇ ਨੇ ਦੋ I
ਚੰਨ ਨੂੰ ਹੁੰਦੀ ਏ ਜਿਵੇਂ ਚਾਨਣੀ
ਦੀਵੇ ਨੂੰ ਹੁੰਦੀ ਏ ਜਿਵੇਂ ਲੋਅ I
ਛੱਡੀਂ ਨਾ ਤੂੰ ਕੋਈ ਮੇਰਾ ਸੁਪਨਾ ਅਧੂਰਾ ਵੇ
ਸ਼ੌਕ ਤੂੰ ਮਜਾਜਣ ਦਾ ਕਰੀਂ ਹਰ ਪੂਰਾ ਵੇ
ਪਵੇ ਦੁਨੀਆਂ ਦੇ ਕੰਨੀੰ ਨਾ ਕਨਸੋਅ I
ਚੰਨ ਨੂੰ ਹੁੰਦੀ ਏ ਜਿਵੇਂ ਚਾਨਣੀ
ਦੀਵੇ ਨੂੰ ਹੁੰਦੀ ਏ ਜਿਵੇਂ ਲੋਅ I
ਜ਼ਿੰਦਗੀ ਦਾ ਹਰ ਰਾਜ਼ ਮੈਂ ਤੇਰੇ ਸੰਗ ਖੋਲ੍ਹਿਆ
ਮੁਆਫ਼ ਕਰੀਂ ‘ਭੱਠਲਾ’ ਜੋ ਮੰਦਾ ਚੰਗਾ ਬੋਲਿਆ
ਤੇਰਾ ਪਿਆਰ ਨਾ ਸਕੇ ਕੋਈ ਮੈਥੋਂ ਖੋਹ I
ਚੰਨ ਨੂੰ ਹੁੰਦੀ ਏ ਜਿਵੇਂ ਚਾਨਣੀ
ਦੀਵੇ ਨੂੰ ਹੁੰਦੀ ਏ ਜਿਵੇਂ ਲੋਅ I
ਧਨਵੰਤ ਭੱਠਲ (ਸਿਡਨੀ)
14/07/2020
