ਗਲਾਸਗੋ/ ਲੰਡਨ (ਮਨਦੀਪ ਖੁਰਮੀ ਹਿੰਮਤਪੁਰਾ)
ਬਰਤਾਨਵੀ ਐਥਲੀਟਾਂ ਦੀ ਟੀਮ ਨੇ ਵਧੀਆ ਖੇਡ ਦਾ ਪ੍ਰਦਰਸ਼ਨ ਕਰਦੇ ਹੋਏ ਟੋਕੀਓ ਉਲੰਪਿਕ ਵਿੱਚ ਕੁੱਲ 65 ਮੈਡਲ ਆਪਣੇ ਨਾਮ ਕੀਤੇ ਹਨ। ਟੀਮ ਗ੍ਰੇਟ ਬ੍ਰਿਟੇਨ (ਜੀ ਬੀ) ਨੇ ਟੋਕੀਓ ਖੇਡਾਂ ਦੇ ਆਖਰੀ ਦਿਨ ਦੋ ਸੋਨ ਤਮਗੇ ਜਿੱਤ ਕੇ ਲੰਡਨ ਉਲੰਪਿਕ 2012 ਵਿੱਚ ਜਿਤੇ ਤਮਗਿਆਂ ਦੀ ਬਰਾਬਰੀ ਕੀਤੀ। ਬਰਤਾਨਵੀ ਟਰੈਕ ਸਾਈਕਲਿਸਟ ਜੇਸਨ ਕੇਨੀ ਦੇ ਸੋਨ ਮੈਡਲ ਨੇ ਐਤਵਾਰ ਨੂੰ ਜੀ ਬੀ ਨੂੰ 64 ਮੈਡਲਾਂ ਤੱਕ ਪਹੁੰਚਾਇਆ ਅਤੇ ਮੁੱਕੇਬਾਜ਼ ਲੌਰੇਨ ਪ੍ਰਾਈਸ ਨੇ ਮਿਡਲਵੇਟ ਫਾਈਨਲ ਵਿੱਚ ਸੋਨ ਤਮਗਾ ਜਿੱਤ ਕੇ ਕੁੱਲ ਗਿਣਤੀ 65 ਤੱਕ ਪਹੁੰਚਾਈ। ਟੋਕੀਓ ਉਲੰਪਿਕ ਵਿੱਚ ਬਰਤਾਨੀਆ ਦੁਆਰਾ ਜਿੱਤੇ ਕੁੱਲ 65 ਤਮਗਿਆਂ ਵਿੱਚ 22 ਸੋਨੇ ਦੇ, 21 ਚਾਂਦੀ ਦੇ ਅਤੇ 22 ਕਾਂਸੀ ਦੇ ਤਮਗੇ ਸ਼ਾਮਲ ਹਨ। ਬ੍ਰਿਟੇਨ ਨੇ ਇਸ ਤੋਂ ਪਹਿਲਾਂ ਰੀਓ ਉਲੰਪਿਕ ਵਿੱਚ ਜੀ ਬੀ ਦੀ ਸਭ ਤੋਂ ਸਫਲ ਮਹਿਲਾ ਅਥਲੀਟ, ਲੌਰਾ ਕੇਨੀ ਨੂੰ ਐਤਵਾਰ ਦੇ ਸਮਾਪਤੀ ਸਮਾਰੋਹ ਵਿੱਚ ਬ੍ਰਿਟਿਸ਼ ਝੰਡਾ ਚੁੱਕਣ ਲਈ ਚੁਣਿਆ ਗਿਆ। ਟੋਕੀਓ ਵਿੱਚ ਟੀਮ ਜੀ ਬੀ ਲਈ ਖੇਡਾਂ ਤੋਂ ਪਹਿਲਾਂ ਕੁੱਲ 52 ਮੈਡਲਾਂ ਜਿਹਨਾਂ ਵਿੱਚੋਂ 14 ਗੋਲਡ ਮੈਡਲਾਂ ਦੀ ਉਮੀਦ ਕੀਤੀ ਗਈ ਸੀ ਪਰ ਐਥਲੀਟਾਂ ਨੇ ਵਧੀਆ ਖੇਡ ਪ੍ਰਦਰਸ਼ਨ ਨਾਲ ਉਮੀਦ ਤੋਂ ਵੱਧ ਪ੍ਰਾਪਤ ਕੀਤਾ। ਟੀਮ ਜੀ ਬੀ ਟੋਕੀਓ 2020 ਵਿੱਚ ਅਮਰੀਕਾ, ਚੀਨ ਅਤੇ ਜਾਪਾਨ ਦੇ ਬਾਅਦ ਮੈਡਲ ਟੇਬਲ ਵਿੱਚ ਚੌਥੇ ਸਥਾਨ ‘ਤੇ ਰਹੀ । ਬਰਤਾਨੀਆ ਦੇ ਐਥਲੀਟਾਂ ਨੇ ਟੋਕੀਓ ਉਲੰਪਿਕ ਵਿੱਚ ਵਧੀਆ ਪ੍ਰਦਰਸ਼ਨ ਕਰਕੇ ਆਪਣੇ ਦੇਸ਼ ਦਾ ਨਾਮ ਰੋਸ਼ਨ ਕੀਤਾ ਹੈ।
