ਬੰਦੇ

ਦੁੱਖਭੰਜਨ ਰੰਧਾਵਾ
0351920036369
ਕੁਝ ਹੁੰਦੇ ਨੇਂ ਬੰਦੇ ਜਿਹੜੇ,
ਬਹੁਤ ਹੀ ਠੰਡੇ ਵਗਦੇ ਨੇਂ |
ਉਹ ਰੱਬ ਦੀ ਰਜ਼ਾ ਚ ਰਾਜੀ਼ ਰਹਿੰਦੇ,
ਓ ਵਾਂਗ ਫਕੀਰਾਂ ਲਗਦੇ ਨੇਂ |
ਕੁਝ ਹੁੰਦੇ ਨੇਂ ਬੰਦੇ ਜਿਹੜੇ,
ਬਹੁਤ ਹੀ ਠੰਡੇ ਵਗਦੇ ਨੇਂ |

ਆਪਣੇ ਇੱਕ ਫਾਇਦੇ ਦੀ ਖਾਤਿਰ,
ਰਿਸ਼ਤਿਆਂ ਵਿੱਚ ਫਿੱਕ ਪਾ ਦੇਂਦੇ ਨੇਂ |
ਜਿੰਦਗੀਨਾਮਾ ਪਾੜ ਬੰਦੇ ਦਾ,
ਅਗਲੇ ਦੇ ਹੱਥ ਫੜਾ ਦੇਂਦੇ ਨੇਂ |
ਉਹਨਾਂ ਨੂੰ ਰੱਬ ਠੱਗ ਲਵੇਗਾ,
ਜੋ ਦੁਨੀਆਂ ਤਾਂਈ ਠਗਦੇ ਨੇਂ |
ਕੁਝ ਹੁੰਦੇ ਨੇਂ ਬੰਦੇ ਜਿਹੜੇ,
ਬਹੁਤ ਹੀ ਠੰਡੇ ਵਗਦੇ ਨੇਂ |

ਕੁਝ ਹੁੰਦੇ ਨੇਂ ਕੰਨੋਂ ਕੱਚੇ,
ਅਗਲੇ ਦੀ ਝੱਟ ਮੰਨ ਲੈਂਦੇ ਨੇਂ |
ਕੱਚੇ ਭਾਵੇਂ ਲਾਹ ਦੇਵੇ ਕੋਈ,
ਕੱਚੀ ਹੀ ਪੱਲੇ ਬੰਨ ਲੈਂਦੇ ਨੇਂ |
ਮਨ ਦਾ ਦੀਪ ਬੁਝਾ ਕੇ ਚੰਦਰੇ |
ਐਂਵੇ ਹੀ ਰਹਿੰਦੇ ਜਗਦੇ ਨੇਂ|
ਕੁਝ ਹੁੰਦੇ ਨੇਂ ਬੰਦੇ ਜਿਹੜੇ,
ਬਹੁਤ ਹੀ ਠੰਡੇ ਵਗਦੇ ਨੇਂ |

ਕੁਝ ਹੁੰਦੇ ਨੇ ਬੰਦੇ ਐਸੇ ਜੋ,
ਬੁਰਿਆਈ ਦਾ ਠੇਕਾ ਲੈ ਲੈਂਦੇ ਨੇਂ |
ਚੰਦਰੇ ਚੰਦਰਪੁਣਾ ਵਿਖਾ ਕੇ,
ਸਹੂਰਾ ਪੇਕਾ ਲੈ ਲੈਂਦੇ ਨੇ |
ਉਹ ਮਰਕੇ ਵੀ ਚੈਨ ਨਈ ਪਾਉਦੇ,
ਅਜ਼ਲਾਂ ਤਾਂਈ ਮਘਦੇ ਨੇਂ |
ਕੁਝ ਹੁੰਦੇ ਨੇਂ ਬੰਦੇ ਜਿਹੜੇ,
ਬਹੁਤ ਹੀ ਠੰਡੇ ਵਗਦੇ ਨੇਂ |

ਕੁਝ ਹੁੰਦੇ ਨੇ ਬੰਦੇ ਐਸੇ ਭਾਈ,
ਮਾਨਸਰਾਂ ਦਿਆਂ ਮੋਤੀਆਂ ਵਰਗੇ |
ਪੀਰਾਂ ਦੀ ਦਰਗਾਹ ਤੇ ਜਗਦੀਆਂ,
ਪਾਕਮ ਪਾਕ ਹੀ ਜੋਤੀਆਂ ਵਰਗੇ |
ਵਾਂਗ ਮਲੰਗ ਦੇ ਰਹਿੰਦੇ ਜਿਹੜੇ,
ਉਹੀ ਯਾਰ ਮਲੰਗਦੇ ਨੇਂ |
ਕੁਝ ਹੁੰਦੇ ਨੇਂ ਬੰਦੇ ਜਿਹੜੇ,
ਬਹੁਤ ਹੀ ਠੰਡੇ ਵਗਦੇ ਨੇਂ |

ਦੁੱਖਭੰਜਨ ਦੇ ਐਬ ਗਿਣਾਂ ਜੇ,
ਐਬਾਂ ਦੇ ਨਾਲ ਭਰਿਆ ਜਾਪੇ |
ਜੇਠ ਹਾੜ ਦੀਆਂ ਧੁੱਪਾਂ ਵਿੱਚ ਵੀ,
ਮੈਨੂੰ ਬੇਲੀ ਠਰਿਆ ਈ ਜਾਪੇ |
ਜੋ ਮੁਸ਼ਕਿਲ ਨਾਲ ਮੱਥਾ ਲਾਉਂਦੇ,
ਓਈਓ ਸਿਪਾਹੀ ਜੰਜ ਦੇ ਨੇਂ |
ਕੁਝ ਹੁੰਦੇ ਨੇਂ ਬੰਦੇ ਜਿਹੜੇ,
ਬਹੁਤ ਹੀ ਠੰਡੇ ਵਗਦੇ ਨੇਂ |