ਮੁਰਾਦ

ਮੌਲਾ ਪੈ ਗਿਆ ਏ ਮੁੱਲ,
ਲੇਖਾਂ ਦੀ ਲਿਖਾਈ ਦਾ |
ਪੂਰੀ ਹੋ ਗਈ ਏ ਮੁਰਾਦ,
ਹੋਰ ਕੀ ਏ ਚਾਹੀਦਾ??

ਮੋਈ ਹੋਈ ਰੂਹ ਵਿੱਚ,
ਫੂਕੇ ਗਏ ਸਾਹ ਜਿਉਂ |
ਹਾਸੇ ਪਾਉਣ ਕਿੱਕਲੀ,
ਤੇ ਜੀਅ ਪਏ ਚਾਅ ਜਿਉਂ |
ਭੇਦ ਨਾ ਪਾਇਆ ਕਿਸੇ,
ਤੇਰੀ ਖੁਦਾਈ ਦਾ |
ਮੌਲਾ ਪੈ ਗਿਆ ਏ ਮੁੱਲ,
ਲੇਖਾਂ ਦੀ ਲਿਖਾਈ ਦਾ |

ਮੇਰੇ ਅੱਜ ਪੈਰ ਚੁੰਮੇ,
ਸੋਨੇ ਦੀਆਂ ਖੜਾਵਾਂ ਨੇਂ |
ਮੈਨੂੰ ਕੀਤੇ ਨੇ ਸਲਾਮ ਅੱਜ,
ਮੇਰਿਆਂ ਪੜਾਵਾਂ ਨੇਂ |
ਸਾਰਾ ਅਸਰ ਇਹ ਹੈ,
ਤੇਰੀ ਰਹਿਨੁਮਾਈ ਦਾ |
ਮੌਲਾ ਪੈ ਗਿਆ ਏ ਮੁੱਲ,
ਲੇਖਾਂ ਦੀ ਲਿਖਾਈ ਦਾ |

ਮੇਰੇ ਜਜਬਾਤ ਅੱਜ,
ਰਹੇ ਨਾ ਕੁਆਰੇ ਓਏ |
ਬੇਸਹਾਰੇ ਨੂੰ ਮਿਲ ਗਏ,
ਰੱਬੀ ਸਹਾਰੇ ਓਏ |
ਮੈਂ ਜਿੰਦਗੀ ਚ ਦਾਅ ਕਦੇ,
ਖਾਧਾ ਨਈਓਂ ਦਾਈ ਦਾ |
ਮੌਲਾ ਪੈ ਗਿਆ ਏ ਮੁੱਲ,
ਲੇਖਾਂ ਦੀ ਲਿਖਾਈ ਦਾ |

ਮੈਂ ਕੱਚੇ ਤੋਂ ਪੱਕਾ ਹੋਇਆ,
ਟੁੱਟਣੋਂ ਵੀ ਬਚਿਆ |
ਮੈਂ ਤੇਰੇ ਬਾਜੋਂ ਕੀ ਦੱਸਾਂ,
ਕਿਵੇਂ-ਕਿਵੇਂ ਮੱਚਿਆ |
ਮਿਲ ਗਿਆ ਵਿਆਜ ਮੌਲਾ,
ਮੇਰੀ ਕਮਾਈ ਦਾ |
ਮੌਲਾ ਪੈ ਗਿਆ ਏ ਮੁੱਲ,
ਲੇਖਾਂ ਦੀ ਲਿਖਾਈ ਦਾ |

ਮੈਂ ਨਈਂ ਤੈਰਾਕ ਤਾਰੀ,
ਫਿਰ ਵੀ ਮੈਂ ਲਾ ਲਈ |
ਤੇਰੇ ਨਾਲ ਕਰ ਰੂਹਦਾਰੀ,
ਏ ਜਿੰਦਗੀ ਬਚਾ ਲਈ |
ਪਤਾ ਨਹੀਂ ਸੀ ਮੈਨੂੰ ਤੇਰੀ,
ਏਨੀਂ ਗਹਿਰਾਈ ਦਾ |
ਮੌਲਾ ਪੈ ਗਿਆ ਏ ਮੁੱਲ,
ਲੇਖਾਂ ਦੀ ਲਿਖਾਈ ਦਾ |

ਤੂੰ ਪੁੱਛੇਂ ਕਦੋਂ ਨਾ ਵੇ,
ਯਾਦ ਮੇਰੀ ਆਵੇਗੀ |
ਦੁੱਖਭੰਜਨ ਨੂੰ ਮੌਤ ਜਦੋਂ,
ਆਪ ਲੈ ਕੇ ਜਾਵੇਗੀ |
ਪਤਾ ਮੈਨੂੰ ਵੀ ਨਾ ਲੱਗਾ,
ਰੂਹ ਏ ਤਿਹਾਈ ਦਾ |
ਮੌਲਾ ਪੈ ਗਿਆ ਏ ਮੁੱਲ,
ਲੇਖਾਂ ਦੀ ਲਿਖਾਈ ਦਾ |